Ligalig sa Mexico: World Cup 2026 Puno ng Saya at Takot Dahil sa Karahasan
Habang nagdiriwang ang mga lungsod ng Mexico bilang isa sa mga host ng World Cup 2026, marami paring Mexikano ang takot lumabas dahil sa patuloy na banta ng karahasan mula sa mga kartel.
Isang malaking kaganapan ang World Cup 2026 para sa mga Mexikano, lalo na't isa ang kanilang bansa sa mga host ng torneo, katuwang ang Estados Unidos at Canada. Sa mga pangunahing lungsod gaya ng Mexico City, Guadalajara, at Monterrey, nag-uumapaw ang kasiyahan at kumpulan ng mga tagahanga sa mga kalsada at pampublikong lugar upang sabay-sabay manood at magdiwang.
Ngunit ibang-iba ang sitwasyon sa maraming bayan at probinsya sa Mexico tulad ng Michoacan, Culiacán (Sinaloa), Poza Rica (Veracruz), at Tamaulipas, kung saan ang banta ng karahasan mula sa mga kartel ay palaging nararanasan. Dito, bihira na ang sabay-sabay na panonood sa labas, at ang sigawan ng tuwa ay madalas nakakubli lang sa apat na sulok ng bahay. Ayon sa isang lime grower mula Michoacan, "Gusto ko talaga ang football, pero kabado kami lagi." Sa gitna ng laban ng Mexico, may mga ulat pa ng pagpapasabog ng mga cartel gamit ang drone sa mga kalapit na bukirin.
Sa Culiacán, imbes na sa mga kalsada, mas pinipiling magsama-sama ang mga tao sa mga bahay o pub na may seguridad upang manood ng laban. Ayon sa ilang negosyante, kahit may World Cup, hindi pa rin bumabalik sa dati ang sigla ng negosyo—marami pa rin ang takot lumabas, lalo na kapag tapos na ang laro.
Sa Poza Rica, kapansin-pansing tahimik ang mga kalsada matapos ang laban ng Mexico laban sa North Korea. Ayon sa lokal na negosyante at manlalaro na si Guillermo Núñez, "Wala nang lumalabas at nagdiriwang. Ninakaw ng karahasan ang gana ng marami na magpunta sa labas at manood ng football."
Pinagmamalaki ng administrasyon ni Presidente Claudia Sheinbaum ang pagbaba ng insidente ng karahasan, na sinamahan pa ng pagpapaigting ng seguridad para sa World Cup. Gayon pa man, nananatili ang takot ng marami—lalo na sa mga lugar na matagal nang tinatamaan ng krimen.
Sa kabila ng mga banta, patuloy pa rin ang ilang tagahanga sa pagdiriwang. Mataas parin ang morale ng ilan tuwing may panalo, at kahit papaano, ang football ay nagiging sandali nilang takasan ang kalungkutan at takot na dala ng araw-araw na panganib.
